Gjykata e Kukësit po zhvillon seancën për verifikimin e kushteve të masës së sigurisë ndaj 22 punonjësve të policisë së Kukësit. Por avokatët pretendojnë se deri në këtë moment nuk ju është vënë në dispozicion vendimi i arsyetuar. I vetmi dokument është dispozitivi i vendimit. Avokatët thonë se janë në pamundësi për të bërë mbrojtje pasi nuk kanë përpara argumentat mbi të cilat gjykata ka bazuar caktimin e masës.
22 punonjësit e policisë janë të dyshuar për veprat penale “Vjedhje duke shpërdoruar detyrën” dhe “Shpërdorim detyre”, që lidhen me vjedhjen e parave të gjobave të makinave me targa të huaja. Nga hetimet rezulton se duke keqpërdorur aksesin në sistemet dhe databazat e Policisë së Shtetit, punonjësit e policisë në terren, konstatonin shkeljen, administronin shumën monetare duke i dhënë drejtuesit të mjetit procesverbalin përkatës dhe në vijim nuk kryenin arkëtimet dhe nuk bënin pasqyrimet përkatëse në sistem, me qëllim përvetësimin në mënyrë të paligjshme të vlerave monetare nga gjobat administrative, në shumën prej 2.200.000 lekë.
