Gjykata e Apelit të Juridiksionit të Përgjithshëm ka vendosur të mos pranojë kërkesën e efektivit të policisë Erjon Goxhara për zbutjen e masës së sigurisë nga “arrest në burg” në “arrest shtëpie”. Goxhara është në burg për plagosjen e inxhinierit të Entit Rregullator të Energjisë (ERE), Lorenc Kostës, ngjarje që ndodhi më 19 gusht në zonën e ‘Komunës së Parisit’ në Tiranë.
Efektivi i policisë e qëlloi Kostën me 6 plumba, pas së cilës u arratis, por më vonë u vetëdorëzua në polici duke shprehur pendesë për veprimin e tij. Kërkesa për masë më të butë sigurie u refuzua nga Apeli, duke e lënë Goxharën në paraburgim.
