Gjykata Kundër Korrupsionit dhe Krimit të Organizuar (GJKKO) ka vendosur lehtësimin e masave të sigurisë për stafin e Universitetit Bujqësor të Tiranës (UBT), i cili ishte nën hetim për shkelje të dyshuara.
Pas këtij vendimi, Kryeministri Edi Rama ka reaguar duke u shprehur i lehtësuar, duke theksuar se jeta universitare nuk mund të merrej peng. Ai sqaroi se ky vendim nuk ndikon në ecurinë e drejtësisë, e cila vijon hetimet dhe proceset gjyqësore. Sipas tij, ishte e rëndësishme të ruhej balanca mes drejtësisë dhe stabilitetit të komunitetit arsimor.
Postimi
Ja pse jam i lehtësuar me lajmin e rrëzimit në Gjykatën Speciale të 20 masave të sigurisë (nga 24) në Universitetin Bujqësor:
Duam luftë pa kompromis kundër korrupsionit, ndëshkim pa mëshirë për çdo dorë që hyn në xhepat e popullit, por po ashtu, nuk mund të bëjmë kompromise në mbrojtje të normave demokratike europiane të drejtësisë.
Pas 100 e kusur vitesh e kemi tërhequr pushtetin politik nga fusha e drejtësisë dhe ia kemi lënë drejtësisë të na hetojë e gjykojë edhe ne, si të gjithë të tjerët, nëse shkelim ligjin.
Shpatën e ndëshkimit ia kemi dorëzuar SPAK-ut. Peshoren e drejtësisë ia kemi besuar Gjykatës Speciale. Por fashon e pavarësisë e paanësisë prokurorët, e sidomos gjykatësit, duhet ta bëjnë pa humbur kohë pjesë të lëkurës së tyre profesionale, në respekt të prezumimit të pafajësisë, të lirive e të drejtave të njeriut, të standarteve demokratike të drejtësisë europiane.
Prandaj, shpatën ta mbajnë lart, e kanë gjithë mbështetjen tonë. Peshorja është e tyrja, nuk ndërhyjmë në brendinë e çështjeve. Por sa herë do t’ua shohim sytë të pambuluar e deri edhe me gjak, nuk do të ngurrojmë ta themi publikisht.
Drejtësia e re e Shqipërisë 2030 në BE duhet të jetë si kjo statujë e Zonjës së Drejtësisë. Për të gjithë. Gjithnjë.
