Gazment Bardhi në cilësinë e kreut të grupit Parlamentar të Partisë Demokratike kërkon nga SPAK hetimin e ish-drejtorit të Autoritetit Portual Durrës, Pirro Vëngu, i sapobetuar si Ministër i Mbrojtjes. PD e akuzon Vëngun për abuzime me procedurën e tenderit për portin e ri të Durrësit në Porto Romano. “Nga burime të hapura dhe shqyrtimi i procedurës përkatëse rezulton se në muajin korrik 2024 Autoriteti Portual Durrës ka nënshkruar një kontratë konsulence me kompaninë Holandeze Royal Haskoning DHV, me vlerë 12 milionë euro, për mbikëqyrjen e punimeve për ndërtimin e portit të ri të integruar të Durrësit në Porto-Romano.
Kjo kontratë është lidhur me negocim të drejtpërdrejtë ndërmjet drejtorit të Autoritetit Portual Durrës, Pirro Vëngu dhe përfaqësuesve të kompanisë private Royal Haskoning DHV, pa iu nënshtruar procedurave të zakonshme të prokurimit public, që nënkuptojnë njoftimin public për tender, paraqitjen e ofertave, vlerësimin e tyre, përzgjedhjen e fituesit dhe nënshkrimin e kontratës, në shkelje të parimeve të barazisë, konkurrencës së lirë dhe trasparencës. Duhet qartë që në nënshkrimin e kësaj kontratë konsulence me një vlerë shumë të lartë ish drekjtori I Autoritetit Portual Durrës, Pirro Vëngu ka shmangur të gjitha rregullat e prokurimit public, duke përzgjedhur drejtpërdrejtë kompaninë fituese, duke cënuar haptazi interesin publike dhe duke dëmtuar rëndë buxhetin e shtetit, me qëllim përfitimin ekonomik të subjektit privat”, thekson Bardhi.
Nisur sa më sipër Gazment Bardhi kërkon nga SPAK të hetojë Vëngun, pasi sipas tij ekzistojnë dyshime të arsyeshme të bazuara në prova, që ai ka konsumuar veprat penale të “shpërdorimit të detyrës” dhe “shkeljes së barazisë në tendera”.
