Franca do të ndalojë pirjen e duhanit në ambiente të caktuara publike duke filluar nga e diela.
Sipas një dekreti të publikuar në Gazetën Zyrtare, ndalimi do të përfshijë plazhet, parqet, oborret publike, stacionet e autobusëve, si dhe hapësirat jashtë shkollave, bibliotekave dhe pishinave. Qëllimi i masës është mbrojtja e fëmijëve nga duhanpirja pasive.
Ndalimi nuk përfshin cigaret elektronike. Shkelësit do të gjobiten me 135 euro. Ministrja për Shëndet dhe Familje, Catherine Vautrin, theksoi rëndësinë e mbrojtjes së të drejtës së fëmijëve për të marrë ajër të pastër.
Çdo vit në Francë vdesin rreth 75.000 persona nga pasojat e lidhura me duhanin. Një anketë e fundit tregon se 62% e francezëve mbështesin ndalimin e pirjes së duhanit në ambiente publike.
