Vrasja e Arlinda Zekajt në Kosovë ka sjellë zhvillime të forta në institucionet e sigurisë. Drejtori i Policisë së Kosovës ka dhënë dorëheqjen, ndërsa autoritetet po hetojnë mënyrën se si janë trajtuar denoncimet dhe kërkesat për mbrojtje të viktimës përpara krimit.
Arlinda Zekaj u vra më 25 tetor në Vitomiricë të Pejës, pavarësisht se më herët kishte denoncuar dhunën dhe kishte kërkuar ndërhyrjen e institucioneve. Vetëm tri ditë përpara vrasjes, ajo kishte paralajmëruar Prokurorinë për rrezikun që i kanosej jetës.
Ngjarja ka nxitur reagime të shumta në Kosovë, duke ngritur pikëpyetje serioze mbi përgjegjësinë e institucioneve për mbrojtjen e viktimave të dhunës në familje.
Një ditë më parë, Policia e Kosovës pezulloi nga detyra 11 zyrtarë policorë, mes tyre drejtues të strukturave rajonale në Pejë dhe hetues që kishin trajtuar rastin.
Ndërkohë, Këshilli Prokurorial i Kosovës ka vendosur pezullimin e kryeprokurores së Pejës, Lumturije Vuçetaj, dhe prokurores së çështjes, Arlinda Nallbani-Gacaferi, ndërsa kanë nisur procedurat për shqyrtimin e përgjegjësive të tyre.
Hetimet paraprake kanë evidentuar mangësi në zbatimin e urdhrave të mbrojtjes dhe në reagimin ndaj paralajmërimeve të viktimës.
Vrasja e Arlinda Zekajt ka shkaktuar edhe protesta qytetare, me kërkesa për drejtësi dhe përgjegjësi institucionale, ndërsa hetimet vijojnë për të përcaktuar nëse mosveprimet e autoriteteve kanë ndikuar në mosparandalimin e krimit.
