Policia e Shtetit ka ashpërsuar ndjeshëm gjuhën për protestat që prej katër ditësh kanë përfshirë Tiranën. Në një deklaratë publike të premten, drejtori i Departamentit për Rendin dhe Sigurinë Publike, Dhimitraq Ziu, njoftoi arrestimin e 127 personave dhe procedimin në gjendje të lirë të 244 të tjerëve. Por pjesa më e rëndësishme e deklaratës nuk lidhej me bilancin e arrestimeve, shkatërrimin e pronës apo përplasjet me policinë. Për herë të parë, në këtë komunikim zyrtar, Policia futi në diskutimin për protestat edhe termin terrorizëm.
Sipas Ziut, strukturat e Hetimit të Krimit Kibernetik dhe Antiterrorit kanë identifikuar kanale dhe grupe komunikimi në internet, ku janë shpërndarë thirrje për akte ekstreme dhe terroriste, si dhe kërcënime ndaj jetës së punonjësve të policisë. Ai deklaroi se është regjistruar procedim penal dhe se po bashkëpunohet me agjenci ndërkombëtare për identifikimin e administratorëve dhe përdoruesve të këtyre grupeve, duke përmendur persona brenda dhe jashtë vendit.
Por deklarata lë pa përgjigje disa pyetje thelbësore. Çfarë aktesh terroriste janë planifikuar konkretisht? A ka të dhëna për një organizim që vepron përtej kufijve të Shqipërisë? Dhe mbi të gjitha, çfarë lidhjeje kanë këto grupe me protestat që po zhvillohen në Tiranë? Policia nuk paraqiti publikisht prova që të mundësojnë dallimin mes thirrjeve të dhunshme në rrjetet sociale dhe një kërcënimi të mirëfilltë terrorist.
Një tjetër element i deklaratës është përdorimi i termit “destabilizim”, i cili prej ditësh është pjesë e retorikës së Kryeministrit Edi Rama dhe anëtarëve të qeverisë për protestat. Policia flet për individë dhe rryma ekstremiste, brenda dhe jashtë vendit, që rrezikojnë shoqërinë dhe të ardhmen e Shqipërisë. Megjithatë, mbetet e paqartë nëse bëhet fjalë për një kërcënim konkret të identifikuar nga hetimet apo për dyshime që ende po verifikohen.
Po aq e paqartë është edhe referenca e Policisë ndaj përhapjes së lajmeve të pavërteta që, sipas saj, synojnë të nxisin ndjenjat nacionaliste dhe të krijojnë klimë konfliktuale. Institucioni nuk specifikoi cilat janë këto lajme, kush i ka shpërndarë dhe çfarë lidhjeje kanë me ngjarjet e ditëve të fundit.
Mbi të gjitha, deklarata ngre edhe një pyetje për përgjegjësinë e vetë institucioneve të sigurisë. Nëse ekzistojnë grupe që bëjnë thirrje për akte terroriste dhe destabilizim, kur janë identifikuar ato dhe çfarë masash janë marrë për të parandaluar veprimtarinë e tyre?
Hetimi i dhunës dhe kërcënimeve ndaj policëve është detyrim ligjor. Por mes vandalizmit, thirrjeve për dhunë dhe terrorizmit ekzistojnë dallime thelbësore juridike. Deklarata e së premtes nuk sqaron nëse Policia po heton një organizim terrorist të lidhur me protestat apo mesazhe në rrjetet sociale, për të cilat ende po vlerësohet përmbajtja penale.
Në një situatë kur qeveria flet për armiq të brendshëm e të jashtëm, ndërsa Tirana përjeton ditë të njëpasnjëshme protestash dhe dhune, kjo paqartësi nuk është e parëndësishme. Policia ka detyrimin të identifikojë autorët e krimeve, por edhe të bëjë dallimin mes tyre dhe qytetarëve që ushtrojnë të drejtën për të protestuar.
