Kimberly Guilfoyle ka njoftuar dorëheqjen nga posti i ambasadores së Shteteve të Bashkuara në Greqi, duke i cilësuar të pavërteta akuzat e fundit për sjellje të pahijshme gjatë ushtrimit të detyrës.
Në një reagim të publikuar të martën në platformën X, Guilfoyle e përshkroi shërbimin si ambasadore si nderin më të madh të jetës së saj, ndërsa falënderoi presidentin Donald Trump dhe sekretarin e Shtetit, Marco Rubio, për mundësinë që iu dha për të përfaqësuar SHBA-në në Greqi.
Njoftimi për dorëheqjen erdhi pasi, sipas raportimeve, Shtëpia e Bardhë i kishte kërkuar asaj të largohej nga detyra. Guilfoyle është përballur me pretendime se kishte pranuar dhurata luksoze gjatë mandatit dhe se kishte kërkuar pagesa financiare në këmbim të sigurimit të qasjes te zyrtarë të administratës amerikane, përpara konfirmimit të saj si ambasadore.
Guilfoyle i ka mohuar akuzat dhe ka deklaruar se do të mbrojë emrin dhe reputacionin e saj. “Këto akuza janë të pavërteta dhe kam ndërmend të mbroj me vendosmëri emrin, reputacionin dhe integritetin tim”, u shpreh ajo, duke shtuar se nuk do të lejojë që pretendimet, të cilat i cilëson të rreme, të përcaktojnë dekadat e shërbimit të saj publik.
Ndërkohë, Zyra e Inspektorit të Përgjithshëm në Departamentin amerikan të Shtetit po heton akuzat ndaj saj. Lajmi për hetimin u raportua nga CNN, duke cituar një burim të njohur me çështjen.
