Në mes të protestave që kanë përfshirë Tiranën, Elisa Spiropali ka gjetur kohën t’i shkruajë një letër Edi Ramës. Dhe, pas një analize të gjatë për korrupsionin, klientelizmin, padrejtësitë, arrogancën e pushtetit dhe revoltën e qytetarëve, ka mbërritur te një zgjidhje që ndoshta nuk do t’i shkonte ndër mend askujt: Shqipërinë duhet ta shpëtojë Partia Socialiste. Mundësisht me Edi Ramën në krye.
Në fakt, Elisa nuk kursen asgjë. Flet për një administratë ku njerëzit punësohen për shkak të lidhjeve, për biznese që mbijetojnë falë pushtetit, për deputetë që i binden kryetarit dhe për një kastë të privilegjuar që nuk duhet mbrojtur më. Përshkruan me hollësi një sistem ku qytetari nuk dëgjohet, drejtësia vonon dhe pushteti është shkëputur nga njerëzit. Vetëm se harron një hollësi të vogël: ky është sistemi ku ajo vetë ka qenë ministre, drejtuese e Parlamentit dhe një prej figurave kryesore të mazhorancës.
Madje, vetëm pak kohë përpara kësaj letre, Spiropali votoi reformën territoriale të qeverisë. Por sot i kërkon Ramës që deputetët të mos jenë thjesht numra në Parlament dhe që partia të mos funksionojë sipas vullnetit të një njeriu të vetëm.
Pastaj vjen receta për shpëtimin. Rama duhet të mbledhë strukturat e PS-së, të udhëheqë ndryshimin, të hapë partinë, të rikthejë meritokracinë dhe të çlirojë institucionet nga kontrolli politik. Pra, njeriu që ka drejtuar vendin për 13 vjet dhe që Spiropali e fton të marrë përgjegjësi për krizën, duhet të jetë edhe garantuesi i daljes prej saj.
Për të mos lënë asnjë dyshim se shpresa nuk ka humbur, letra përfundon me një deklaratë pothuajse dashurie politike. “Ed’”, të cilit i ka renditur të gjitha mëkatet e qeverisjes, mbetet idealisti dhe intelektuali i dikurshëm, tek i cili Elisa beson se e mira është “pakrahasimisht më e madhe se gjithçka tjetër”.
Spiropali përmend edhe rotacionin dhe zgjedhjet e reja, por nuk kërkon largimin e Ramës. Ajo kërkon që ndryshimi të udhëhiqet prej tij. Me sa duket, pas gjithë asaj që ka shkruar për gjendjen e vendit, nuk arrin të imagjinojë një zgjidhje politike që të mos kalojë nga dera e Partisë Socialiste.
Dhe kështu, ndërsa të rinjtë në rrugë kërkojnë largimin e Edi Ramës, Elisa Spiropali u ofron një zgjidhje tjetër: të presin derisa Edi Rama të ndryshojë Edi Ramën. Shqipëria mund të ndryshojë, mjafton që Partia Socialiste të mbetet aty ku është.
