Enkelejd Musabelliu është zëvendësministri i ri i Ekonomisë, Kulturës dhe Inovacionit. Një emër thuajse i panjohur për publikun, Musabelliu pritet të jetë një nga personat që do të merret me reformën e pensioneve, një politikë qeveritare e paralajmëruar këto ditë nga Kryeministri Edi Rama.
Zoti Musabelliu ka punuar më parë në sektorin e pensioneve së bashku me Erion Veliajn. Gjatë periudhës 2013-2015, ai ka mbajtur pozicionin e Këshilltarit të Ministrit të atëhershëm të Mirëqenies Sociale dhe Rinisë, ku u angazhua kryesisht në reformën e pensioneve të vitit 2014. Kjo reformë, megjithatë, dështoi si në teori ashtu edhe në praktikë, duke sjellë përsëritjen e problematikave dhe nevojën për një reformë të re. Çuditërisht, të njëjtët njerëz që dështuan herën e parë do të jenë sërish pjesë e procesit. Riciklimi i figurave të besuara të Erion Veliajt ndoshta është një taktikë politike e Kryeministrit, por për publikun kjo duket thjesht si një formë për të risjellë në skenë individë pa ndonjë përvojë të shquar në fushën e pensioneve. Për më tepër, Enkelejd Musabelliu është diplomuar për filozofi në Universitetin e Tiranës.
