Elon Musk ka shkaktuar polemika të reja me një reagim të ashpër ndaj ish-kryeministrit të Kanadasë, Justin Trudeau. Pas deklaratës së Trudeau se “Kanadaja nuk do të bëhet kurrë pjesë e Shteteve të Bashkuara,” Musk u përgjigj me një koment ironik dhe agresiv në platformën X (ish-Twitter).
“Vajzë, ti nuk je më guvernator i Kanadasë, kështu që nuk ka rëndësi se çfarë thua,” shkroi Musk, duke e minimizuar deklaratën e Trudeau dhe duke e barazuar atë me një guvernator të një shteti amerikan.
Ky reagim vjen pas dorëheqjes së Trudeau nga posti i kryeministrit dhe pas deklaratave të Donald Trump, i cili ka promovuar idenë se Kanadaja mund të bëhet “shteti i 51-të” i SHBA-së. Trump madje publikoi harta të redaktuara ku kufijtë mes dy vendeve ishin zhdukur.
Nga ana tjetër, Trudeau ka theksuar se “Kanadaja nuk ka as më të voglin interes për të ndryshuar statusin e saj si një shtet sovran.” Ai shtoi se partneriteti ekonomik dhe i sigurisë midis dy vendeve është i fortë dhe nuk kërkon ndryshime të tilla ekstreme.
Përgjigja e Musk ka shkaktuar reagime të shumta, duke e vendosur atë përsëri në qendër të vëmendjes për komentet e tij provokuese në mediat sociale.
