“Platformat e rrjeteve sociale duhet të jenë neutrale dhe të mos ndërhyjnë në çështjet politike të vendeve të tjera.”
Ky është reagimi i fortë që ka ardhur nga Spanja kundër fushatës që CEO i platformës ‘X’, Elon Musk duket se ka ndërmarrë kundër disa prej qeverive në Europë.
Reagimi erdhi nga zëdhënësja e qeverisë spanjolle, pasi Musk komentoi statistikat për të huajt e burgosur për përdhunim në vend.
Pilar Alegría po i përgjigjej një pyetje në lidhje me konfrontimin mes pronarit miliarder të platformës ‘X’ dhe liderëve evropianë, si kryeministri britanik Keir Starmer dhe presidenti francez Emmanuel Macron.
“Ne besojmë se këto platforma duhet të funksionojnë gjithmonë me neutralitet absolut dhe mbi të gjitha pa ndërhyrje", tha ajo në konferencën për shtyp.
Të dielën, Musk, i cili do t'i bashkohet administratës së Donald Trump si këshilltar i jashtëm, komentoi me një pasthirrmë befasie ("Wow"), duke ripostuar në platformën e tij, nga llogaria e Visegrad24, një raport mbi dënimet për përdhunimet në Katalonja.
Shkrimi u botua në gazetën “La Razon” më 27 shtator me titullin “91% e të dënuarve për përdhunim në Katalonjë janë të huaj” dhe me nëntitull “emigrantët përbëjnë 17% të popullsisë totale të rajonit”.
Shifrat nga autoritetet katalanase të cituara nga gazeta në atë kohë treguan se 22 nga 24 personat e dënuar për përdhunim në Katalonjë nuk ishin shtetas spanjollë.
Kryeministri spanjoll Pedro Sanchez, qëndrimi liberal i të cilit për emigracionin është kritikuar ashpër nga partia e ekstremit të djathtë Vox, hodhi poshtë çdo lidhje midis emigracionit dhe krimit, duke thënë se "të huajt nuk janë as më të mirë dhe as më të keq se spanjollët".
