Ministri i Turizmit, Kulturës dhe Sportit, Blendi Gonxhja, ka lëshuar deklarata të forta ndaj protestës qytetare, duke paralajmëruar se brenda pak ditësh, sipas tij, do të bëhet e qartë se kush qëndron pas organizimit të saj dhe nga drejtohet. I ftuar në emisionin Off the Record me Andrea Dangllin në A2 CNN, Gonxhja u shpreh se ata që mendojnë se mund të sjellin një “revolucion francez me gijotinë në bulevard” e kanë gabim dhe se, sipas tij, do të marrin “përgjigjen e duhur”.
Ministri deklaroi se në ditët në vijim do të dalin në dritë, sipas tij, prapaskenat e protestës. “Keni për të parë mrekullira për pak ditë, do të shihni se nga ku pilotohet kjo dhe nga vijnë këto”, u shpreh ai.
Gonxhja komentoi edhe sloganin “Rama n’burg, Berisha n’burg”, duke e cilësuar atë një strategji politike të qëllimshme. Sipas tij, vendosja e emrave të Edi Ramës dhe Sali Berishës në të njëjtin slogan është “strategjia më antishqiptare” dhe nuk qëndron. Ai shtoi se ka marrë mesazhe nga artistë që, sipas tij, distancohen nga kjo thirrje dhe theksojnë se nuk e shohin të drejtë barazimin mes dy figurave politike. Ministri shtoi gjithashtu se artistët, sipas mesazheve që ka marrë, gëzojnë mbështetje nga shteti dhe po kalojnë një nga periudhat më të mira të aktivitetit të tyre.
