Sonja Biserko, kryetare e Komitetit të Helsinkit për të Drejtat e Njeriut në Serbi, ka komentuar situatën e fundit në veri të Kosovës, duke e lidhur atë me kontekste më të gjera gjeopolitike.
Ajo thekson se sulmi i fundit terrorist ka rikthyer Ballkanin Perëndimor në vëmendjen kryesore të sigurisë për Perëndimin. Sipas saj, reagimi i shpejtë i vendeve perëndimore për të mbështetur qeverinë e Kosovës tregon se qendrat e inteligjencës europiane mund të kenë të dhëna për autorët e incidentit.
“Akti terrorist në Kosovë duhet analizuar në një kontekst më të gjerë europian. Mbështetja e menjëhershme nga Perëndimi është tregues i mundësisë që inteligjenca europiane ka informacione të rëndësishme për ata që qëndrojnë pas sulmit,” u shpreh Biserko.
Ajo shtoi se ngjarjet e fundit kanë vendosur Serbinë në një pozitë të vështirë, veçanërisht për shkak të tensioneve të brendshme dhe protestave në vend. Biserko sugjeron se presidenti serb Aleksandar Vuçiç mund të shfrytëzojë këtë situatë për të zhvendosur fokusin nga problemet e brendshme të Serbisë dhe për të përfituar nga zhvillimet e mundshme në politikën ndërkombëtare, përfshirë mundësinë e një rikthimi të Donald Trumpit në Shtëpinë e Bardhë.
