Në emisionin “Top Story” në Top Channel, kryetari i Partisë Demokratike, Sali Berisha, pati një përplasje me analistin Arjan Sulo lidhur me strategjinë e protestave dhe efektivitetin e tyre për të larguar kryeministrin Edi Rama.
Gjatë diskutimit, Sulo e sfidoi Berishën mbi kontradiktat e qëndrimeve të tij, duke pyetur nëse do të merrnin pjesë në zgjedhje nëse Rama mbetet kryeministër deri në maj 2025, dhe nëse pritet një ndryshim qëndrimi nga SHBA në favor të Partisë Demokratike. Përgjigjja e Berishës ishte e qartë: “Mosbindje civile deri në rrëzimin e diktaturës, ka 77 forma.”
Kur Sulo e kritikoi format e protestës, duke thënë se “Nuk rrëzohet Rama me 3 orë tek rrethrrotullimi i Shqiponjës,” Berisha iu përgjigj me një paralajmërim për protesta më të gjata, duke deklaruar se janë të gatshëm të qëndrojnë “3 ditë, 3 javë.”
Në fund të debatit, Berisha u shpreh se pjesëmarrja në protestat e fundit ka qenë e madhe dhe e rëndësishme. Duke cituar një histori të Perandorit Adrian, ai tha se rrëzimi i një “diktature” kërkon përpjekje të vazhdueshme dhe të përsëritura, duke lënë të kuptohet se lëvizja e tyre është vetëm në fillimet e saj.
