Vetëm një ditë pasi Belind Këlliçi deklaroi se Sali Berisha nuk synon të bëhet sërish kryeministër, vetë kreu i Partisë Demokratike dha një përgjigje që duket se e rrëzon këtë narrativë.
Në një intervistë një natë më parë, Këlliçi u shpreh se Berisha nuk është në këtë betejë për një ambicie personale, por për rikthimin e votës së lirë dhe demokracisë.
“Zoti Berisha e ka thënë që nuk është në këtë betejë për aspiratë personale, por për rikthimin e procesit elektoral dhe votës së lirë. Ai e ka parë veten si misionar në këtë proces.”
Madje, sipas Këlliçit, Berisha kishte lënë të kuptohej se kandidati i opozitës për kryeministër do të përcaktohej përmes primareve brenda Partisë Demokratike pas fitores së zgjedhjeve.
Por vetëm pak orë më vonë, i pyetur se kur do të udhëtojë drejt Shteteve të Bashkuara, Berisha dha një përgjigje që shkon në drejtim të kundërt.
“Nuk them se do të shkoj vetëm pasi të fitojmë zgjedhjet, si kryeministër. Do të shkoj edhe më parë, natyrisht në momentin e përshtatshëm. Unë jam në opozitë dhe mund të shkoj për të marrë pjesë në një konferencë.”
Fakti që Berisha flet për mundësinë e udhëtimit në SHBA “pasi të fitojmë zgjedhjet, si kryeministër”, tregon se ai jo vetëm nuk e ka përjashtuar kandidimin për këtë post, por vazhdon ta konsiderojë veten si pretendent për drejtimin e qeverisë.
Deklarata e sotme bie ndesh me mesazhin që përcolli Këlliçi vetëm një ditë më parë, duke ngritur pikëpyetje nëse brenda Partisë Demokratike ekziston një strategji e unifikuar për çështjen e kandidatit për kryeministër, apo nëse zyrtarë të ndryshëm po japin sinjale të ndryshme për të njëjtën temë.
Në politikë, deklaratat kanë peshë. Dhe kur ato vijnë brenda 24 orëve nga dy figurat kryesore të së njëjtës forcë politike, kontrasti nuk kalon pa u vënë re.
