Sali Berisha është i gatshëm të bashkëpunojë me Edi Ramën për të ndryshuar Kushtetutën dhe Kodin Zgjedhor. Bëhet fjalë për votën e emigrantëve dhe afatet e përcaktuara gabim në marrëveshjen e parë mes PS dhe PD, ku vëmendja ishte te mbyllja e listave dhe jo te përcaktimi i saktë i afateve për votën e shqiptarëve që jetojnë jashtë vendit.
“Ne rast se debatet dhe mendimi i ekspertëve kërkon që për këtë problem të ketë ndryshime në Kod apo në Kushtetutë, ne jemi të gatshëm,” - deklaroi sot Sali Berisha në një konferencë për shtyp, duke lënë të hapur mundësinë e një marrëveshjeje të dytë për Kodin mes PS dhe PD.
Ndërsa Rama ka nisur një fushatë të ethshme për të garantuar votën e emigrantëve, duke përfshirë administratën dhe patronazhistët, mbetet i pakuptueshëm zelli i Berishës për këtë çështje. E vetmja shpresë për demokratët duket se mbetet që “ballot” e Jozefinës në Amerikë dhe gjetkë të sjellin një lum votash për ta në zgjedhjet e 11 majit të ardhshëm.
