Prokuroria e Durrësit përfundoi hetimet dhe dorëzoi për gjykim dosjen penale ndaj gjyqtares, Arnisa Këlliçi. Burime zyrtare pranë këtij institucioni thanë për VNA se gjyqtarja është marrë e pandehur për akuzat e “kallëzimit të rremë” dhe “falsifikimit të dokumentave”. Dosja penale, pritet të kalojë filtrin e gjyqtarit paraprak dhe më pas të fillojë shqyrtimi në themel. Arnisa Këlliçi ndërkohë mohon çdo akuzë.
Nga hetimi ka rezultuar se gjyqtarja e Tiranës ka bërë kallëzim të rremë, pasi kishte shkruar vetë një letër kërcënuese, që e përdori më pas në Këshillin e Lartë Gjyqësor, si prove për kërcënimin e pretenduar dhe ky institucion i dha mbrojtje fizike.
Që letra ishte shkruar nga vetë Këlliçi u provua përmes aktit të ekspertimit grafik.
Nisur nga ky aktekspertim, prokuroria ngriti ndaj Këlliçit edhe akuzën e “falsifikimit të dokumenteve”. Fillimisht hetimet u kryen nga prokuroria e Tiranës, por dosja i kaloj për kompetencë prokurorisë së Durrësit. Arnisa Këlliçi kallëzoi një prokuror si autorin e kërcënimit, ndërsa implikoi edhe ish-gjyqtarë të gjykatës së Tiranës që kishte patur kolegë. Pasi shpërtheu skandali, Këshilli i Lartë Gjyqësor vendosi ta pezullojë nga detyra Arnisa Këlliçin.
