Gjykata e Apelit të Juridiksionit të Përgjithshëm ka ndryshuar masën e sigurisë ndaj regjisorit dhe producentit Petri Bozo, duke zëvendësuar “arrestin në burg” me “arrest në shtëpi”. Gjykata ka urdhëruar njëkohësisht lirimin e tij të menjëhershëm nga paraburgimi.
Bozo ndodhej në paraburgim prej fundit të muajit maj, pas aksidentit tragjik të ndodhur mëngjesin e 25 majit 2026 në fshatin Mengël, në aksin Elbasan–Librazhd, ku automjeti që drejtonte përplasi për vdekje një fëmijë 7-vjeçar.
I mituri, nxënës i klasës së parë, ndodhej pranë shkollës së fshatit Mengël së bashku me nënën e tij, pasi kishin shoqëruar motrën në shkollë. Ai u godit nga automjeti i drejtuar nga Bozo dhe humbi jetën si pasojë e plagëve të marra.
Pas ngjarjes, Bozo u arrestua dhe më 28 maj Gjykata e Elbasanit vlerësoi të ligjshëm arrestimin në flagrancë dhe caktoi ndaj tij masën e sigurisë “arrest në burg”. Prokuroria e Elbasanit e heton për veprën penale të parashikuar nga neni 290/3 i Kodit Penal, që lidhet me shkeljen e rregullave të qarkullimit rrugor me pasojë vdekjen.
Mbrojtja e producentit e kundërshtoi që në fillim masën e arrestit në burg, duke kërkuar një masë më të butë sigurie.
Edhe një ankim i mëparshëm nuk pati sukses. Më 16 korrik, Gjykata e Apelit la në fuqi vendimin e Gjykatës së Elbasanit dhe Bozo vijoi të qëndronte në paraburgim.
Më pas, mbrojtja iu drejtua sërish gjykatës me kërkesë për zëvendësimin e masës së sigurisë. Kërkesa u shqyrtua fillimisht në Elbasan, ku u rrëzua, duke u lënë në fuqi “arresti në burg”.
Pas ankimit të këtij vendimi, çështja mbërriti përsëri në Gjykatën e Apelit. Këtë herë gjykata vlerësoi ndryshe kushtet për vazhdimin e masës së sigurimit dhe vendosi që Bozo të largohet nga paraburgimi.
Me vendimin e marrë më 15 gusht, “arresti në burg” është zëvendësuar me “arrest në shtëpi”, ndërsa është urdhëruar lirimi i menjëhershëm i Petri Bozos nga qelia.
Hetimi penal për aksidentin me pasojë vdekjen e 7-vjeçarit vijon. Ndryshimi i masës së sigurimit lidhet vetëm me kushtet në të cilat Bozo do të qëndrojë gjatë procedimit dhe nuk përbën vendim përfundimtar për përgjegjësinë e tij penale.
