Aksi rrugor Elbasan–Cërrik, në afërsi të fshatit Kuqan, vijon të jetë i bllokuar prej rreth tri orësh, pas shembjes së një segmenti rreth 20 metra të gjatë të një kanali vaditës.
Si pasojë e dëmtimit të kanalit, uji ka dalë nga shtrati dhe ka marrë me vete sasi të konsiderueshme dheu dhe inertesh nga kodrat përreth. Uji dhe materialet kanë përfunduar në trupin e rrugës, duke vështirësuar fillimisht dhe më pas duke ndërprerë plotësisht qarkullimin e automjeteve.
Bllokimi ka krijuar probleme të konsiderueshme për drejtuesit e mjeteve që përdorin aksin Elbasan–Cërrik, ndërsa qarkullimi në segmentin e prekur vijon të jetë i ndërprerë.
Ende nuk është përcaktuar shkaku i shembjes së kanalit. Mbetet për t’u verifikuar nëse dëmtimi ka ardhur si pasojë e amortizimit të strukturës apo faktorëve të tjerë.
