Një 52-vjeçar është arrestuar nga Policia e Elbasanit, pasi dyshohet se tentoi të vriste me armë zjarri një 50-vjeçar në ambientet e jashtme të një lokali.
Ngjarja ndodhi rreth orës 13:00, në lagjen “28 Nëntori” në Elbasan. Sipas Policisë, shtetasi Poli Borici 52 vjeç, dyshohet se tentoi të qëllonte me pistoletë shtetasin Ermir Bitoci alias Këndezi., 50 vjeç.
Menjëherë pas njoftimit, shërbimet e Policisë nisën kërkimet për identifikimin dhe kapjen e autorit. Në kuadër të operacionit të koduar “Reagimi”, 52-vjeçari u lokalizua dhe u arrestua.
Policia bëri të ditur se ka gjetur dhe sekuestruar edhe pistoletën që dyshohet se u përdor gjatë tentativës për vrasje.
Nga ngjarja nuk raportohet për persona të plagosur.
Nën drejtimin e Prokurorisë vijojnë hetimet për të sqaruar rrethanat, motivin e konfliktit dhe për të dokumentuar plotësisht ngjarjen.
