Kryetari i bashkisë së Tiranës, Erion Veliaj, për të ulur rolin e bashkisë së Tiranës në aferën e inceneratorëve, deklaroi sot se institucioni që ai drejton është njëri prej 5 bashkive të qarkut të Tiranës. Por gazetarja Ola Xama, deklaroi në emisionin “Të Paekspozuarit” në MCN TV se bashkia e Tiranës është kliente në 90 për qind të punës së inceneratorit që nuk ekziston. Ajo deklaroi se bashkia dhe Veliaj ishin në dijeni të gjithçkaje ka ndodhur.
“Bashkia e Tiranës është kliente e inceneratorit të Tiranës në masën 90 për qind. Autoriteti që merret me mbetjet e qytetit është bashkia e Tiranës.
Bashkia ka qenë në dijeni të gjithçkaje nga Ministria e Mjedisit te kompania koncesionare kur ka marrë rolin e autoritetit kontraktor. Bashkia e Tiranës dhe zoti Veliaj ishin në dijeni të planit të fizibilitetit, kush do t’i merrte përsipër kostot e shpronësimit dhe të financimit. Ishte letra e zotit Veliaj që dy përfaqësuesit e saj, tashmë nën hetim, Namik Simixhiu dhe Taulant Tusha, ishin pjesë e grupit negociues të kontratës ku u shpall fituese kompania “Integrated Energy”.
Është këshilli bashkiak i Tiranës që miratoi planin e financimit dhe është bashkia që shtroi terrenin për kontratën që miratoi fitime të padrejta prej 60 milionë euro prej dherave dhe me tarifa që vendosi vetë koncesionari. Ato i vendosi vetë kompania dhe ndërtuesit thonë se i kanë parë te faqja e internetit të kompanisë”-tha Xama.
