Sipas raportit të parë mbi vrasjet e grave dhe femicidin në Shqipëri, për periudhën 2021-2023, janë regjistruar 32 viktima. Raporti, i publikuar nga Observatori Shqiptar i Femicidit në bashkëpunim me Avokatin e Popullit dhe UN Women, zbulon se 90% e këtyre vrasjeve janë kryer nga partnerë intimë ose anëtarë të familjes.
Nga këto, 24 raste janë klasifikuar si femicide, të cilat përkufizohen si vrasje të grave për shkak të gjinisë së tyre. Mbi 60% e femicideve kanë ndodhur në banesat e viktimave. Ky raport synon të rrisë ndërgjegjësimin për këtë fenomen dhe të nxisë ndërhyrje më efektive për parandalimin e dhunës ndaj grave dhe vajzave.
