Zyra e OKB-së në Tiranë i ka kthyer përgjigje letrës së dërguar dhe firmosur nga deputetët e PD që kërkonin largimin e ekspertes Linda Rama nga detyra e saj që e mban prej shumë vitesh. Në përgjigje thuhet:
“UN Albania është e angazhuar për një proces rekrutimi transparent dhe të paanshëm, i organizuar sipas praktikave më të mira të përcaktuara nga Kombet e Bashkuara. Procesi ynë i rekrutimit të konsulentëve ndjek praktika të drejta, transparente dhe pa diskriminim në çdo hap. Kjo përfshin praktika të hapura dhe konkurruese të punësimit, me shpallje të gjerë të pozicioneve të lira, për të tërhequr një grup sa më të larmishëm dhe të kualifikuar aplikantësh. Të gjithë konsulentët e OKB-së përzgjidhen në bazë të kushteve të mirë-përcaktuara të punës, dhe aplikantët vlerësohen sipas kritereve objektive, ekspertizës teknike përkatëse dhe përputhshmërisë strikte me udhëzimet organizative, për të siguruar që projektet të realizohen me integritet dhe pavarësi.”
Me gjuhën diplomatike të një organizate ndërkombëtare, zyra e OKB-së në Tiranë e ka zhvlerësuar kërkesën e PD duke mbrojtur së pari veten dhe stafin për sa kohë mban përgjegjësi për raportet e botuara nga zyra e Tiranës.
Së dyti, ka hedhur në erë strategjinë e komunikimit të opozitës e cila pak muaj para zgjedhjeve zgjedh të merret me detaje të parëndësishme të një qeverie që ka kaq shumë probleme dhe skandale për të denoncuar. Por duket qartë se mënyra e vjetër për të sulmuar familjarët, devijuar denoncimin tek banaliteti dhe jo tek thelbi i problemit mbetet cilësi e ndëshkuar herët e opozitës.
Së treti, Në vitin 2021 PD arriti të marrë një numër rekord votash dhe të nxisë një frymë optimiste për fitoren e opozitës që ishte shumë afër fitores. Dhe strategjia, ashtu si dhe ajo e vitit 2005, u përqendrua tek optimizmi, alternativa, programi dhe lënia pas e akuzave familjare dhe personale.
Linda Rama mund të ketë gjithë mëkatet e botës për të bërë politikë dhe opozitë, por të përdorësh punën e saj si eksperte për të fituar pikë në publik është njësoj si të publikosh emailet e Argita Berishës kur kërkonte përqindje nga biznesmenët që i ofronte babait dhe të shkruash: leksion si të pasurohesh nga babai kryeministër.
