Ish-Presidenti dhe kreu i Partisë së Lirisë, Ilir Meta, nga qelia ku ndodhet aktualisht, ka uruar ish-Presidentin amerikan Donald Trump për rezultatin e zgjedhjeve në SHBA, duke e konsideruar si një rikthim të merituar në Shtëpinë e Bardhë.
Meta shprehu mbështetjen dhe urimet e tij të përzemërta në emrin e tij dhe të Partisë së Lirisë, duke e cilësuar këtë fitore si një triumf për vlerat dhe demokracinë amerikane. “Urimet më të përzemërta, në emrin tim dhe të Partisë së Lirisë, për Ju President i 47-të i Shteteve të Bashkuara të Amerikës, Donald Trump, për këtë Fitore të Madhe dhe rikthim të merituar dhe me plot sakrifica të betejës Tuaj të pandalshme për mbrojtjen e vlerave të SHBA dhe kombit mik amerikan,” ka thënë Meta.
Në mesazhin e tij, Meta thekson se ky triumf është një mesazh i rëndësishëm që kombi amerikan u jep të gjithë botës, duke treguar se “fati i demokracisë është vetëm në duart e qytetarëve.”
