Një 25-vjeçare me inicialet A. D., e cila pësoi djegie të rënda në rreth 85% të trupit si pasojë e një zjarri të rënë në hotelin ku po pushonte, është nisur drejt Turqisë për të marrë kujdes mjekësor të specializuar.
Pas stabilizimit dhe kujdesit intensiv pranë Qendrës Spitalore Universitare "Nënë Tereza" (QSUT), janë përmbyllur të gjitha procedurat mjekësore dhe administrative për transportin e saj, njofton ministria e shëndetësisë.
Transferimi u realizua në bashkëpunim të ngushtë mes QSUT-së, Ambasadës së Turqisë dhe autoriteteve shëndetësore turke.
Të gjitha kostot e trajtimit mjekësor në spitalin turk do të mbulohen plotësisht nga shteti shqiptar, nëpërmjet Ministrisë së Shëndetësisë dhe Mbrojtjes Sociale, thuhet në njoftim.
