Policia e Shtetit ka shpallur zyrtarisht në kërkim ndërkombëtar shtetasin rumun, i dyshuar si ekzekutori i Renato Hoxhajt, i cili u vra në mëngjesin e 27 prillit 2025, në hyrje të pallatit ku banonte. Kërkimi ndërkombëtar u bë pasi më herët Gjykata e Vlorës kishte caktuar ndaj tij masën e sigurisë "arrest me burg" për akuzën e vrasjes me paramendim, kryer në bashkëpunim.
Sipas burimeve policore, i dyshuari besohet se fshihet në Greqi, ku dyshohet se ka edhe bazën e tij. Autoritetet greke po bashkëpunojnë me policinë shqiptare për kapjen e tij.
Ndërkohë, për ekzekutimin e rojës së një objekti në ndërtim është arrestuar Eris Mehmetaj, djali i ish-deputetit demokrat Xhevdet Mehmetaj. Ai është arrestuar nën dyshimet për krijimin e kushteve për kryerjen e vrasjes. Edhe pse ka refuzuar të flasë para hetuesve, dyshohet se ai ka siguruar mjetin me të cilin u krye krimi.
Vrasja e Renato Hoxhajt dyshohet se është urdhëruar nga Dubai.
