Një incident është regjistruar ditën e sotme në një qendër votimi në zonën e Kasharit, ku është ushtruar dhunë fizike ndaj sekretarit të KZAZ-së, Remzi Mehmetaj.
Në një deklaratë për mediat, përfaqësuesi i Partisë Demokratike, Belind Këlliçi, akuzoi vëzhguesit e maxhorancës si autorë të dhunës, duke e cilësuar ngjarjen si një “krim zgjedhor të mirëorganizuar”. Ai njoftoi se çështja do të referohet në SPAK dhe se PD do të ndjekë penalisht të gjithë personat e përfshirë.
“Sherri u bë nga vëzhguesit e maxhorancës. Personat që kanë dhunuar sekretarin e KZAZ janë larguar. Policia ka ardhur, por deri tani sa dimë nuk kanë bërë asgjë. Ky është krim zgjedhor dhe do ta dërgojmë në SPAK. Këta individë i kemi shpallur terroristë elektoralë dhe si të tillë do trajtohen nga PD, nga i pari tek i fundit,” – u shpreh Këlliçi.
Sipas tij, personi që ka ushtruar dhunë mund të mos ketë qenë i akredituar nga Komisioni Qendror i Zgjedhjeve, çka rëndon edhe më shumë situatën ligjore. Sekretari i KZAZ-së, Remzi Mehmetaj, ka bërë kallëzim penal për ngjarjen. Rei Nozlli autor i përplasjes është shoqëruar në polici
