Të mërkurën paradite Policia Shqiptare njoftoi goditjen e një grupi të strukturuar kriminal që kryente mashtrime nëpërmjet një platforme investimesh online.
Policia e Shtetit doli të mërkurën me një njoftim zyrtar në Facebook, lidhur me një skemë mashtrimi kompjuterik që kryhej nëpërmjet një Call Center në Tiranë.
“Vihen në pranga tre organizatorët e kësaj veprimtarie kriminale, punohet për kapjen e dy të tjerëve”, shkruhet në njoftimin zyrtar të Policisë së Shtetit.
Drejtoria për Hetimin e Krimeve Kibernetike në bashkëpunim me Sektorin për Hetimin e Krimeve Ekonomike dhe Financiare në kuadër të operacionit policor të koduar “Platforma” identifikuan autorët e këtyre mashtrimeve kompjuterike.
Ky grup i strukturuar kriminal kishte përshtatur katin e parë të një ndërtese në Tiranë në një qendër Call Center, nëpërmjet të cilës kryente edhe mashtrimet kompjuterike dhe financiare.
“Materialet proceduriale iu referuan Prokurorisë së Tiranës, për veprime të mëtejshme”, citon njoftimi i policisë.
