Zjarri që ka përfshirë prej më shumë se 15 orësh landfillin e Elbasanit vijon të djegë, ndërsa tymi i dendur ka mbuluar të gjithë zonën përreth. Prej orëve të para të mëngjesit, dhjetëra efektivë zjarrfikës po vijojnë përpjekjet për fikjen e flakëve, por era e fortë po e bën të vështirë ndërhyrjen dhe po favorizon përhapjen e zjarrit.
Gjatë natës, tymi toksik mbuloi qytetin e Elbasanit ndërsa era frynte nga perëndimi në drejtim të lindjes. Ndërkohë, me ndryshimin e drejtimit të erës, reja e tymit është zhvendosur dhe tashmë ka mbërritur deri në qytetin e Cërrikut, në anën perëndimore të Elbasanit, duke rritur shqetësimin për banorët e zonës.
Autoritetet janë ende në terren, por për shkak të sipërfaqes së madhe të mbeturinave që digjen dhe erës së fortë, zjarri vazhdon të mbetet aktiv, ndërsa mbetet e paqartë se kur mund të vihet nën kontroll plotësisht.
