Greqia dhe disa vende të tjera europiane po përballen me një rritje të lehtë të rasteve me Covid-19, të nxitur nga përhapja e variantit të ri NB.1.8.1, i njohur si “Nimbus”, pjesë e linjës Omicron. Sipas autoriteteve shëndetësore, rritja e infeksioneve ka nisur që nga mesi i qershorit dhe po sfidon sezonin veror, një periudhë kur zakonisht infeksionet respiratore janë më të rralla.
Në Greqi, kjo rritje po reflektohet përmes shtimit të vizitave te mjekët, më shumë testeve pozitive dhe një rritjeje prej 15% në kërkesat për ilaçe antivirale. Aktualisht, 82 pacientë janë të shtruar në spitale, me 16 pranime të reja gjatë 24 orëve të fundit, por pa një shtim të ndjeshëm të rasteve të rënda.
Edhe në vendet e tjera të Bashkimit Europian, ECDC raporton një rritje të ngjashme të qarkullimit të virusit, megjithatë treguesit e rëndësishëm si pranimet në kujdes intensiv apo vdekjet mbeten të ulëta, pa shkaktuar presion mbi sistemet shëndetësore.
Ndërkohë, autoritetet europiane po shprehin shqetësim për mbulimin e ulët të vaksinimit tek grupet më të rrezikuara, pasi vetëm një shtet i BE-së ka arritur të vaksinojë mbi 80% të të moshuarve mbi 80 vjeç.
Varianti “Nimbus” është më ngjitës sesa variantet aktuale dhe po përhapet gjithashtu në Kinë, Hong Kong dhe Singapor, por nuk ka prova që ky variant shkakton forma më të rënda të sëmundjes ose që shmang ndjeshëm imunitetin e krijuar nga vaksinat.
