Një vaksinë eksperimentale dhe e personalizuar kundër kancerit, e zhvilluar nga Moderna dhe Merck, ka dhënë rezultate pozitive në provën e saj të parë të fazës së tretë, duke e afruar terapinë me një miratim të mundshëm rregullator.
Vaksina, e bazuar në teknologjinë mRNA, u kombinua me Keytruda të Merck në një studim ku morën pjesë më shumë se 1,100 pacientë me melanoma me rrezik të lartë ose të avancuar, të cilëve tumoret u ishin hequr më parë përmes ndërhyrjes kirurgjikale.
Sipas rezultateve fillestare, kombinimi i vaksinës me Keytruda zgjati ndjeshëm periudhën gjatë së cilës pacientët mbetën pa shenja të melanomës, krahasuar me trajtimin vetëm me Keytruda. Terapia uli gjithashtu rrezikun që sëmundja të përhapej në pjesë të tjera të trupit.
Ndryshe nga vaksinat tradicionale, kjo terapi është krijuar në mënyrë të personalizuar për çdo pacient, duke synuar mutacionet specifike të tumorit të tij. Synimi është që sistemi imunitar të trajnohet për të identifikuar dhe shkatërruar qelizat kancerogjene, ndërsa Keytruda ndihmon në forcimin e përgjigjes imune.
Kompanitë planifikojnë të prezantojnë rezultatet e plota në një konferencë të ardhshme mjekësore. Studimi do të vijojë gjithashtu të vlerësojë ndikimin e trajtimit në mbijetesën e përgjithshme të pacientëve.
Studiuesit e kanë cilësuar rezultatin si një përmirësim të rëndësishëm klinik krahasuar me Keytruda-n, ndërsa efektet anësore të raportuara deri tani kanë qenë të ngjashme me ato të trajtimeve rutinë.
Megjithatë, vaksina mbetet ende një terapi eksperimentale dhe nuk është miratuar për përdorim të përgjithshëm. Para se të bëhet e disponueshme për pacientët, nevojiten vlerësime të mëtejshme dhe procesi rregullator përkatës.
