Gjatë janarit dhe shkurtit të shohësh makina me targa të Kosovës ka qenë diçka e zakonshme sidomos në zonën e Durrësit dhe Golemit ku ky grup vendosen tradicionalisht gjatë gjithë vitit për fundjava apo pushime më të gjata.
Një rikthim të tyre e pohuan gjatë nëntorit, dhjetorit dhe janarit edhe strukturat akomoduese edhe pse sipas tyre ritmi i rikthimit ka qenë i ngadaltë.
Tashmë edhe zyrtarisht shifrat tregojnë për një rikthim të shqiptarëve të Kosovës ku vetëm gjatë janarit u regjistruan 237 mijë hyrje me një rritje 10 për qind në raport me muajin e parë të vitit të shkuar.
Në vendin e dytë kanë mbetur italianët të cilët janë grupi i dytë më i madh në hyrje me mbi 63.6 mijë të tilla apo me një rritje prej 18.8 për qind.
Ky grup i turistëve sikurse konfirmohet nga operatorët turistikë po bëhet gjithmonë e më i shpeshtë me frekuentim të mirëprogramuar në pak ditë në një kërkesë diverse për eksplorim në zona kulturore, agroturistike, në fundjava argëtuese në qytete si Tirana, Durrësi. Një grup jo i vogël janë vizitorë që vijnë për biznes dhe punë ose për turizmin shëndetësor.
Mali i Zi dhe Maqedonia e Veriut vijnë respektivisht në vendin e tretë dhe të katërt me një numër prej 59 mijë dhe 50 hyrje dhe një rritje prej 12 dhe 5.5 për qind në janar 2025 krahasuar me janarin 2024.
Më pas vijnë hyrjet nga Greqia me një rritje 20 për qind në janar 2025 dhe nga Turqia nga ky kanë ardhur mbi 14 mijë vizitorë.
Në tërësi ka një rritje të turistëve nga vendet Europiane këtë janar që lamë pas ku bie në sy Gjermania me 46 për qind në raport me janar 2024, France me 15 për qind apo Spanjë me 33 për qind.
Në rënie sipas të dhënave zyrtare janë polakët të cilët në janar 2025 numëronin mbi 3100 hyrje apo 28.3 për qind më pak se janari 2024. Ky është grupi më i qëndrueshëm i turistëve në vend sa i takon atij të organizuar por duket se rënia vjen si efekt i turistëve individualë ku shumë prej tyre kanë filluar të frekuentojnë Shqipërinë jashtë paketave të agjencive të huaja.
Pavarësisht kësaj lëkundjeje të janarit polakët mbeten sërish grupi më i madh i turistëve të organizuar në vend, vendosur kryesisht në bregdetin e Durrësit dhe Kavajës. Kontratat me garanci për këtë vit të nënshkruara në sezonin e kaluar u raportuan me një rritje prej 25 për qind në raport me vitin 2024./MONITOR
