Një javë pas incidentit të ndodhur me djalin e biznesmenit Samir Mane, ku dinamikat dhe përplasjet për zbardhjen e ngjarjes shkaktuan reagimin ekstrem të policit që firmosi ndalimin e tij, Sali Berisha ka bërë thirrje për protestë. Në fakt, për 7 ditë me radhë opozita dhe mediat e mëdha në vend heshtën në mënyrë shurdhuese për një ngjarje të rëndë, ku së paku duhet të kërkonin transparencë.
Sali Berisha dhe gjithë drejtuesit e PD heshtën edhe kur Ministri i Brendshëm, në mënyrë arrogante, i hodhi edhe më shumë baltë ngjarjes dhe mungesës së transparencës për të zbardhur çfarë realisht kishte ndodhur.
“Lëvizja Bashkë” ishte e para që lajmëroi një protestë për të kërkuar hetim dhe zbardhje për këtë ngjarje. Thirrjes së saj iu bashkuan edhe partitë e tjera të vogla, që sot në orën 17:00 do të mblidhen përpara Ministrisë së Brendshme për të protestuar. Thirrja për t’u bashkuar në këtë tubim edhe nga Sali Berisha është e papritur në kohën kur PD, kryetari i saj dhe drejtuesit ende nuk kanë mundur të artikulojnë asnjë fjalë për ngjarjen, për punonjësin e policisë, për të mos folur për emrin e biznesmenit.
Sesa e sinqertë është kjo thirrje për t’u bashkuar protestës mbetet për t’u parë. Nëse vërtet kërkon transparencë, edhe pse me shumë vonesë, PD dhe drejtuesit e saj duhet ta nisin reflektimin nga zanafilla e ngjarjes për të kërkuar përgjegjësit atje ku ndodhen dhe jo vetëm në Ministrinë e Brendshme.
Përndryshe, thirrja për protestë për hir të të qenurit në protestë mund të jetë një alibi e re që Sali Berisha ka gjetur për të prishur punë në një protestë qytetare, që edhe pse mund të jetë e vogël në numër, ka gjithmonë më shumë impakt se çdo tubim ku drejtuesit kërkojnë vota më shume se drejtësi.
Njerëzit e lirë do të protestojnë sot kundër qeverisë dhe oligarkisë
