Aleks Marku, 40 vjeç, mbante peng 2 fëmijët e tij të mitur, 6 dhe 11 vjeç në një banesë në Durrës që e kishte marrë me qera javore.
Rreth orës 02:20, është njoftuar Policia se dëgjoheshin të shtëna me armë zjarri, në ambientet e një pallati pranë zonës së quajtur “Shkëmbi i Kavajës”.
40-vjeçari ka qëlluar mbi 15 herë nga dritarja e ballkonit.
Policia e Durrësit kërkoi ndihmën e Repartit Special “RENEA”, pasi duhej ndërhyrje e specializuar për të mos rrezikuar jetën e fëmijëve.
Nën masa të larta sigurie, u bë i mundur neutralizimi dhe kapja e shtetasit Aleks Marku të cilit në banesë iu gjet një armë zjarri kallashnikov, një krehër me fishekë, si dhe 18 gëzhoja në brendësi të banesës.
Marku ka pranuar të shoqërohet nga policia,në gjendje të rënduar psikologjike ka dëshmuar se qëllonte nga dritarja se priste se do ta sulmonin disa persona, por pa treguar se kush.
Gjithashtu, Policia nxorri të 2 fëmijët, të cilët janë në gjendje të mirë shëndetësore dhe po iu jepet asistencë me psikologë.
