Në mbledhjen e fundit të Komisionit të Ligjeve, deputeti Enkelejd Alibeaj foli për Komisionin Xhafaj dhe vakancat në Gjykatën Kushtetuese. Alibeaj tha se marrëveshja që sipas tij, synon të dëmtojë SPAK-un me komisionin përkatës, antikorrupsion të pretenduar. Duke iu referuar arrestimit të Jurgis Çyrbes, ai u shpreh se një deputet nuk është i pranishëm në komision për shkak të aktiviteteve të SPAK-ut, duke theksuar se çdo tentativë për të ndikuar në këtë institucion është e papranueshme.
“E them këtu në Komisionin e Ligjeve që një nga punët më të paudha që është duke u përgatitur është pikërisht çështja e marrëveshjes në distancë për të goditur SPAK-un, me komisionin përkatës, antikorrupsion të pretenduar. Ndaj kemi detyrim, që ndaj publikut të jemi të qartë. Një nga kolegët tuaj sot nuk është në Komisionin e Ligjeve për efekt të veprimtarisë së SPAK-ut. Kjo është një arsye më e madhe sot që kushdo që çon ndërmend, qoftë edhe për së largu, të shtrijë tentakulat tek SPAK-u, t'i fusë duart në xhepa apo diku tjetër dhe të mos i shtrijë drejt SPAK-ut” – tha Alibeaj.
Alibeaj gjithashtu kritikoi kryetaren e Kuvendit, Elisa Spiropali, për veprimet e saj të njëanshme lidhur me vakancën në Gjykatën Kushtetuese, e cila ka përcaktuar që mandati i pasardhësit të shtyhet deri në 2028-ën. Ai e ka quajtur këtë një shkelje të kompetencave të Kuvendit, si dhe kërkoi që komisioni të mbajë një qëndrim të qartë për këtë çështje dhe të rikthejë transparencën në punën e Parlamentit.
“Së dyti, një çështje tjetër që ka kaluar në heshtje. Një muaj më parë posti i një anëtari të Gjykatës Kushtetuese ka mbetur vakant. Ajo që ka ndodhur, media të paktën ka tre ditë që sjellin në mend, edhe Zëri Amerikës ka shkruar për këtë çështje, Kryetarja e Kuvendit, znj.Spiropali ka marrë përsipër mënyrë individuale dhe personale, që teksa ka shpallur vendin vakant, ka përcaktuar ajo vetë që mandati për të cilën do të duhet të konkurrojnë, të shtyhet deri në 2028-ën. Ndërkohë, që sipas rregullave ligjore dhe kushtetuese është parashikuar, bazuar edhe tek reforma në drejtësi, që mandatet janë të përcaktuara në ligj dhe që asnjë autoritet nuk ka të drejtën që të mund të luajë me Kushtetutën sipas interesave të tyre. Kanë shkruar media gjërë e gjatë. Çështja është publike. I takon këtij komisioni të mbajë një qëndrim. Nëse kryetarja e Kuvendit nuk do të lexojë Kushtetutën, nuk di të lexojë Kushtetutën apo do ta lexojë mbrapsht, ka instrumentat profesional dhe politik, Komisioni i Ligjeve apo Këshilli i Legjislacionit për të marrë një opinion se si do duhet të trajtohet çështja e mandateve të Gjykatës Kushtetuese.
Kryetarja e Kuvendit nuk mund të uzurpojë një kompetencë e cila është e Kuvendit. Ligji për Gjykatën Kushtetuese thote se e përcakton Kuvendi dhe jo kryetarja e Kuvendit.
Në këtë mjegullën e krijuar. Në këtë situatën ku publikut i fshihet nga sytë veprimtaria e Parlamentit, mungesa e transparences ka përfitimet e vogla. Futet në xhep një anëtar i Gjykatës Kushtetuese. Ndaj është një detyrim.
Po ua kërkoi ju si Kryetare e Komisionit, si anëtare e Konferencës së Kryetarëve që të gjeni mundësinë për të sjellë në hullitë e Kushtetutës. Kërkesa ime është që ju si deputete te maxhorancës keni detyrim për të kthyer parlamentin në rrugën ligjore dhe për të mos i hedhur benzinë zjarrit të ndezur nga të tjerë, per të zbatuar detyrimet ndaj qytetarëve për t'u informuar mbi veprimtarinë e Parlamentit” – u shpreh Alibeaj.
