Reduktimi i javës së punës në katër ditë mund të ketë përfitime të rëndësishme për shëndetin dhe mirëqenien e punonjësve, sipas një studimi të ri ndërkombëtar të zhvilluar në gjashtë vende.
Në programin pilot morën pjesë rreth 2,900 punonjës nga 141 organizata në Australi, Kanada, Irlandë, Zelandë të Re, Mbretërinë e Bashkuar dhe Shtetet e Bashkuara. Ata reduktuan orët e punës me rreth 20%, pa pësuar ulje të pagës.
Përpara nisjes së eksperimentit, kompanitë kaluan një periudhë dy-mujore trajnimi për të përmirësuar organizimin e punës dhe efikasitetin. Më pas, gjatë gjashtë muajve, u zbatua java katërditore e punës ose një orar i reduktuar.
Rezultatet treguan se punonjësit raportuan më pak lodhje profesionale (burnout), shëndet më të mirë mendor dhe fizik, si edhe kënaqësi më të madhe në punë. Studiuesit vunë re se sa më shumë reduktohej orari i punës, aq më të mëdha ishin përfitimet për mirëqenien e punonjësve.
Sipas analizës, përfitimet lidhen kryesisht me ndjenjën më të madhe të kontrollit mbi punën, përmirësimin e cilësisë së gjumit dhe uljen e stresit të përditshëm.
Shumica e kompanive pjesëmarrëse vendosën ta vazhdojnë modelin edhe një vit pas nisjes së projektit, ndërsa studiuesit nuk konstatuan rënie të produktivitetit apo të mirëqenies së punonjësve.
Eksperti Brendan Burchell nga Universiteti i Kembrixhit e cilësoi studimin si një “pikë kthese”, duke thënë se ai ofron provat më të forta deri më sot se java katërditore mund të zbatohet me sukses në organizata të ndryshme.
Ndërkohë, gjithnjë e më shumë vende, si Spanja, Polonia, Islanda, Gjermania dhe Portugalia, po shqyrtojnë ose po testojnë modele të javës së reduktuar të punës, si një mënyrë për të luftuar stresin, depresionin dhe lodhjen profesionale.
