Një stacion zjarrfikësish në Gjermaninë perëndimore është djegur dhe 10 makina zjarrfikëse janë shkatërruar për shkak se në objekt nuk ishin instaluar alarme zjarri.
Objekti, i cili ndodhej në Stadtallendorf, ishte vlerësuar si një strukturë “moderne dhe bashkëkohore” kur u hap vitin e kaluar. Megjithatë, vetëm disa muaj më vonë, zjarrfikësit nga Stadtallendorf dhe zonat përreth u përballën me detyrën e sikletshme për të shuar një zjarr në stacionin e tyre.
Ndërtesa nuk kishte alarme zjarri të instaluara sepse ishte caktuar si një vend për ruajtjen e pajisjeve, sipas gazetës lokale Oberhessische Presse. Ky lloj objekti nuk kërkonte ligjërisht instalimin e alarmeve të zjarrit.
Lars Schafer, inspektori i zjarrfikësve të rrethit, u tha gazetarëve: “Është një makth për një zjarrfikës. Askush nuk dëshiron të shuajë zjarrin në stacionin e tij.”
Sipas dëshmitarëve, rreth 170 zjarrfikës, përfshirë vullnetarët lokalë, u përpoqën të përballonin zjarrin.
