Prokuroria e Posaçme shpalli pretencën për Dritan Lleshin, i akuzuar për “Ushtrim të ndikimit të paligjshëm ndaj personave që ushtrojnë funksione publike” dhe kërkoi dënimin e tij me 1 vit burgim. Për shkak të gjykimit të shkurtuar, dënimi reduktohet në 8 muaj burgim. Ai premtoi punësimin e një të riu si inspektor mjedisi në Fier, në këmbim të shumës prej 400.000 lekësh.
Nga hetimi gjyqësor rezulton e provuar se shtetasi A.N., i punësuar në një njësi të shitjes së karburantit “Veliaj Petrol”, është paraqitur më datën 8.10.2020 në Drejtorinë Vendore të Policisë, në fshatin Gorre të Lushnjës, dhe ka bërë një kallëzim.
Sipas këtij kallëzimi, në vitin 2019, i pandehuri Dritan Lleshi, i njohur prej tij me emrin Dritan Ndreca, me origjinë nga Puka ose Laçi, banues në fshatin Ngurrëz e Vogël, Lushnjë, i ka premtuar A.M., bashkëshortes së A.N., punësimin e djalit të tyre, E.N., si inspektor mjedisi në Fier, kundrejt shumës prej 400.000 lekësh.
I pandehuri i ka thënë se kishte një vëlla në Tiranë, me emrin P.N., i cili punonte në Ministrinë e Brendshme dhe përmes tij do të ndërhynte që djali i kallëzuesit të fitonte konkursin për inspektor mjedisi në Fier ose Lushnjë. Sipas planit të prezantuar prej të pandehurit Dritan Lleshi, kjo do të realizohej në muajin qershor të vitit 2019, kohë kur A.N. i ka dorëzuar edhe një kapar prej 200.000 lekësh Dritan Lleshit, i cili më pas e shtyu mundësinë për punësim në shtator të të njëjtit vit.
Nga analiza e provave dhe të dhënave të grumbulluara në kuadër të hetimit të këtij procedimi penal, rezulton e provuar se i pandehuri Dritan Lleshi, me lidhje familjare me P.N. (djali i xhaxhait), ka kryer veprën penale “Ushtrim i ndikimit të paligjshëm ndaj personave që ushtrojnë funksione publike”. SPAK ka nisur procedim penal edhe ndaj A.N. për “Ushtrim të ndikimit të paligjshëm ndaj personave që ushtrojnë funksione publike”.
