Një operacion i gjerë i Agjencisë Kombëtare të Krimit në Mbretërinë e Bashkuar (NCA) ka çuar në arrestimin e gjashtë personave të dyshuar për kontrabandë kokaine përmes aeroportit të Manchesterit, mes të cilëve edhe dy shtetas shqiptarë me banim në qytetin e Liverpool-it.
Katër burra janë tashmë të akuzuar zyrtarisht për përfshirje në rrjetin e trafikut të drogës. Ata do të paraqiten sot para Gjykatës së Mançesterit për t’u përballur me drejtësinë. Të pandehurit janë:
- Dale Hosker, 49 vjeç, banues në Palatine Road, Bury;
- Dale Creen, 34 vjeç, nga Mere Fold, Worsley;
- Elton Hallaçi, 31 vjeç, shtetas shqiptar, me banim në Adlam Road, Liverpool;
- Artur Iseberi, 27 vjeç, gjithashtu shqiptar, me adresë në Aintree Lane, Liverpool.
Sipas autoriteteve britanike, aktiviteti kriminal që u atribuohet këtyre personave daton në muajin maj të vitit 2024, kur dyshohet se janë kryer transportet e paligjshme të kokainës përmes aeroportit të Manchesterit.
Në kuadër të të njëjtit hetim, më 17 qershor 2025, janë ushtruar kontrolle dhe janë kryer arrestime në disa zona të Greater Manchester dhe Liverpool, ku janë ndaluar edhe dy shqiptarë të tjerë, përkatësisht në dy prona të ndara në zonën Fazakerley, Liverpool.
Në total, gjatë këtij operacioni janë arrestuar:
- Dy shqiptarë të moshave të ndryshme në Fazakerley, Liverpool;
- Dy burra në të 40-at dhe të 20-at, në një pronë në Bury;
- Një burrë në të 30-at, në një tjetër pronë në Bury;
- Një tjetër burrë në të 30-at, në një adresë në Worsley.
Të gjithë këta persona dyshohet se janë përfshirë në trafikun e kokainës në maj të vitit të kaluar dhe aktualisht ndodhen në paraburgim, ku po merren në pyetje nga hetuesit e NCA.
Ndërkohë, dy persona të tjerë të arrestuar një ditë më parë janë liruar me kusht, teksa hetimet vazhdojnë për të zbuluar gjithë rrjetin dhe lidhjet e mundshme ndërkombëtare të këtij trafiku.
Një zëdhënës i NCA deklaroi për mediat:
“Këto arrestime janë rezultat i një hetimi të gjatë dhe kompleks. NCA po punon intensivisht, brenda dhe jashtë vendit, për të luftuar kërcënimin që vjen nga drogërat e klasit A, veçanërisht kur ato trafikohen përmes infrastrukturës sonë ajrore.”
Hetimet janë ende në zhvillim dhe priten zhvillime të tjera në ditët në vijim.
