Struktura e Posaçme kundër Korrupsionit dhe Krimit të Organizuar (SPAK) ka dorëzuar prova të reja në Gjykatën e Posaçme, në kuadër të hetimeve për dosjen “Buka”, ku i pandehur është ish-zëvendëskryeministri Arben Ahmetaj, i cili ndodhet në arrati.
Gjatë tre muajve të fundit, prokurori Elvin Gokaj ka përmbushur detyrat hetimore të caktuara nga gjyqtari i çështjes, i cili kishte kthyer dosjen për hetime të mëtejshme.
Avokati mbrojtës i Ahmetajt kërkoi kohë shtesë për t’u njohur me provat e reja të dorëzuara nga SPAK, çka bëri që seanca gjyqësore të shtyhet për më datë 17 korrik.
Arben Ahmetaj është i pandehur për akuzën e shpërdorimit të detyrës. Sipas SPAK, në kohën kur ushtronte detyrën e ministrit të Financave, ai ka lejuar privatizimin e shoqërisë “Buka” sha, duke shkaktuar dëm të konsiderueshëm në buxhetin e shtetit.
Ndërkohë, Ahmetaj është gjithashtu nën hetim për korrupsion, pastrim parash dhe fshehje pasurie, në lidhje me aferën e inceneratorëve.
