“Të nderuar kolegë të spitalit Onkologjik. Prej kohësh kam hapur një polemikë mbi kabinetin e brachiterapisë. Problemi i ngritur nga unë lidhet me dhomën, e cila nuk ka mbrojtjen e duhur, e domosdoshme për shëndetin e të gjithëve, tonin si staf, por edhe të njerëzve të tjerë që hyjnë e dalin. Ashtu si kirurgu përdor dorezat dhe maskën, ashtu si përdorim doza të kontrolluara të medikamenteve, ashtu kontrollohet dhe rrezatimi.
Ju drejtohem të gjithëve dhe kush të ketë informacion, të na e thotë, cilat janë standartet e një ambjenti për aktivitetin e brachiterapisë me cobalt 60.
Heshtja juaj nuk është aftësi profesionale, apo përfitim sado i vogël. Nëse nuk kemi standarte në mbrojtjen nga rrezatimi kush me shumë e kush më pak jemi të dëmtuar. Kërkesa ime nuk është për mua, por për të gjithë bashkë. Kush më mirë se në duhet ti njohë këto probleme?”.
Dr.Adrian Hoti, radiolog, është i pari mjek që ngriti shqetësimin se rrezatimi i pajisjes së kobaltit, që mbahej në kushte të papërshtatshme po kthehej në burim të madh rreziku për jetën e pacientëve dhe të mjekëve e stafit të spitalit.
Ai iu shkroi kolegëve në një grup pune në whats-app me emërtimin “Shërbimi Onkologjik QSUT”.
Disa nga bluzat e bardha reaguan dhe kërkuan trasparencë të plotë, pasi rrezatimi po rrezikonte seriozisht shëndetin e tyre.
“Mendoj se të paktën duhet të jeni në dijeni të nivelit të rrezatimit aktual të matur nga autoriteti përkatës i certifikuar. Kjo shifër nuk nuk besoj se është sekret ushtarak”, shkruan një tjetër mjek.
“Nuk mund të mos bëhen trasparente vlerat e rrezatimit, kjo është shqetësuese me pasojë dëmtimin e rëndë të shëndetit të stafit. Zgjidhja e një problemi të tillë nuk është fshehja, por zgjidhja në kohë”, shkruan Fatjona Kraja.
“Kjo problematikë e ngritur nga Dr.Hoti duhet patjetër të marri përgjigje të përgjegjshme dhe sigurtë nga instancat kompetente. Aty nuk flitet vetëm për sigurinë e stafit që punon në atë repart, por të gjithë personelit mjekësor e suportiv, ashtu dhe të pacientëve e familjarë që janë shpesh në ato ambjente”, shkruan dr.Helidon Nina.
“Sikurse kam informuar disa prej jush të cilat kanë pyetur, aktualisht matjet e kryera tregojnë se ka 0 rezatim si dhe ka një angazhim optimal nga strukturat përgjegëse për mbrojtjen nga rrezatimit për të siguruar standartet e nevojshme”, ju përgjigjet njëri nga kolegët.
Pavarësisht se Dr.Hoti ngriti zërin në mënyrë të përsëritur, ai u detyrua të largohej nga detyra me dorëheqje, pasi nga ana e drejtuesve të Shërbimit Onkologjik nuk mori asnjë masë për mbrojtjen e mjekëve, personelit, apo pacientëve.
Ekspertët vlerësuan rrezatim të lartë në Onkologjik dhe vetëm pas nisjes së hetimit pajisja e kobaltit u vendos në ambjent të përshtatshëm.
Për këtë cështje, prokuroria ka ngritur dyshime për shpërdorim detyre, për ish-zv.drejtoreshën e QSUT Brikena Qirjazi dhe Ish specialisten e QSUT-së, Drilona Kishta.
Pajisja e kobaltit që shërben për trajtimin e të sëmurëve të diagnostikuar me sëmundje tomorale dhe sidomos të sëmundjeve të kancerit të lëkurës, nga 2021 nuk u vu asnjëherë në punë, ndërsa u mbajt në ambjente të papërshtatshme dhe jo në një një bunker antiradioaktiv ose antiatomik, sikurse parashikon Agjensia Atomike e Vienës ose Agjencia Ndërkombëtare që thirret IEAHEA, duke u shndërruar ne burim potencial rreziku për jetën e mjekëve e pacientëve.
