Në vitin 1999, me gjysmë dëshire, u regjistrova në Fakultetin Ekonomik, duke ndjekur rrugën e Administrim-Biznesit. Zgjedhja ime për ekonominë ishte më tepër praktike, meqë mesataren e kisha mbi 9 dhe, si thuhej në Shkodër, “Të lejon me hangër bukë gjithkund” ????. Në fakt, pas ngjarjeve të vitit 1997, largimi nga shtëpia për të ndjekur artin në Tiranë dukej i pamundur, kështu që ekonomia u bë shoqja ime e përditshme.
Në vitin 2003, përfundova studimet dhe hapi im i parë profesional ishte në administratën shtetërore, duke punuar në Zyrën Rajonale të Kthimit dhe Kompensimit të Pronave. Ishte një përvojë që më mësoi se zbatimi i teorive të mësuara në shkollë kërkon jo vetëm njohuri, por edhe shumë vullnet e përkushtim .
Pas disa viteve në administratë, kalova në sektorin privat, ku për shtatë vite menaxhova degën e kompanisë PRIMO Communications në Shkodër. Si menaxhere, përvoja ime në Administrim-Biznes ishte e vlefshme, por shërbimi ndaj klientëve më solli sfida të reja dhe më mësoi anën më të vështirë të këtij profesioni. Puna në këtë sektor më rriti respektin për ata që përballen me sfida të përditshme në botën e biznesit dhe shërbimit ndaj klientëve .
Ndërkohë që karriera ime ekonomike po përparonte, nuk e humba kurrë lidhjen me artin. Vitet e fundit, përveç profesionit tim kryesor, përfundova një master për Zhvillim Rural , i pari i këtij lloji në Shqipëri, me bashkëpunim nga UBT dhe Universiteti IUSVE në Itali ????????. Tashmë, për shtatë vite, kam punuar si agjente zhvillimi rural në organizatën VIS Albania, duke kontribuar në zhvillimin e zonave të izoluara të veriut të Shqipërisë – Shkodër, Malësi e Madhe, Burrel dhe Klos.
Një nga mësimet më të rëndësishme që mora në universitet ishte koncepti i Kostos Oportune – të vlerësosh çfarë do të fitoja nëse burimet e mia, qofshin para apo kohë, do t’i shpenzoja ndryshe. Fillimisht, e aplikoja këtë për paratë , por me kalimin e viteve, fillova ta përdor për menaxhimin e kohës sime . Kam mësuar pesë gjuhë të huaja , dhe nuk shpenzoj më kohë për gjëra që nuk kanë vlerë për mua.
