Koço Kokëdhima në vitin 2016 humbi mandatin e deputetit, pasi u akuzua për përfitim fondesh shtetërore edhe pasi mori mandatin e deputetit, konkretisht 150 tendera të përfituara gjatë kohës që ishte deputet.
Sot, deputeti Vullnet Sina akuzohet nga opozita se ka përfituar të ardhura nga Buxheti i Shtetit, në vlerë disa milion lekë, përmes 9 kompanive të tij private, gjatë periudhës ku ushtron edhe mandatin e deputetit.
Sot është dorëzuar në Kuvend kërkesa mocion për heqjen e mandatit të deputetit Vullnet Sina. 14 deputetë opozitarë kanë firmosur mocionin, duke listuar 30 prova shoqëruese. PD ka njoftuar se mocioni, së bashku me të gjitha provat që kompanitë e tij kanë përfituar pagesa miliona lekshe nga Buxheti i Shtetit, u dorëzua zyrtarisht sot në Kuvend.
Më konkretisht, ai ka shkelur pikën 3 të nenit 70 në Kushtetut, ku thuhet qartë se: “Deputetët nuk mund të kryejnë asnjë veprimtari fitimprurëse që buron nga pasuria e shtetit ose e pushtetit vendor dhe as të fitojnë pasuri të këtyre”.
Pika pasardhëse e nenit 70 shprehet se “Për çdo shkelje të paragrafit 3 të këtij neni, me mocion të kryetarit të Kuvendit ose të një së dhjetës së anëtarëve të tij, Kuvendi vendos për dërgimin e çështjes në Gjykatën Kushtetuese, e cila konstaton papajtueshmërinë.” Deputeti Sina, në një reagim në mediat sociale shpjegon se ka hequr dorë që nga viti 2017 nga administrimi i bizneseve të tij dhe se i është përkushtuar vetëm politikës. Deputeti shkruan se nuk ka përfituar nga buxheti i shtetit as kur ka qenë deputet as pasi i zgjodh si ligjvënës.
Deputeti biznesmen Vullnet Sina është pronari me 100 % të kapitalit i kompanisë “BIGALB GROUP”, me të cilën menaxhon rreth 67 pika supermarketesh “Big Market”.
