Ministri i ri i Mbrojtjes Pirro Vëngu ka patur idenë "gjeniale" që pas satelitëve të luftojë zjarret me dronë Bayraktar.
Në një njoftim për media thuhet se "Pas testit të kaluar me sukses për misione gjatë natës, dronët “Bayraktar” do të kalojnë së shpejti në funksion monitorues 24 orë në shtatë ditë të javës, si një element mbështetës i rëndësishëm krah autoriteteve vendore në betejën kundër zjarreve.
Ministri i Mbrojtjes Pirro Vengu, shoqëruar edhe nga komandanti i Forcës Ajrore gjeneral brigade Ferdinant Dimo inspektuan bazën ajrore të Kuçovës dhe njësinë e dronëve, e cila tashmë është plotësuar me personel të kualifikuar.
Kjo njësi tashmë ka rritur gatishmërinë edhe pas trajnimit të pilotëve për misionet në kushtet e errësirës".
Rezultatet e imazheve të dronëve “Bayraktar” do të jenë kyçe për të mbështetur bashkitë edhe në procesin e evidentimit të dëmeve të krijuara nga zjarret.
Në fakt nuk kuptohet pse qeveria nuk përdor pamjet e satelitëve Albania 1 dhe Albania 2. Në prezantimin e tyre Kryeministri Rama, asokohe tha se, satelitët do të ndihmojnë për të patur kontroll të plotë mbi të gjithë territorin e vendit tonë dhe se Shqipëria nuk do t'i dërgojë për ofensivë ushtarake apo kërkime në Mars por do të shërbejnë për çështje civile të vendit.
Fakt është që deri tani nuk kemi patur asnjë njoftim apo raportim zyrtar mbi të dhënat apo sinjalizimet e ardhura prej këtyre satelitëve. Madje vendi anembanë Shqipërisë, në pyje e male u dogjën, Lezha për pak nuk pësoi katastrofë njerëzore nga zjarri masiv që goditi këtë verë.
