Trajneri i kombëtares së Shqipërisë, Silvinjo, theksoi se ekipi synon vendin e parë në grupin e Ligës së Kombeve. Ai shprehu se kuqezinjtë do të kërkojnë fitoren në sfidën ndaj Ukrainës për të mbajtur gjallë shpresat për objektivin e vendosur që në fillim të kompeticionit.
Gjatë konferencës për shtyp, Silvinjo u pyet nëse mund të luajë me dy sulmues në qendër. Ai u përgjigj se nuk e preferon këtë formacion, por theksoi se do të vendoset për formacionin përfundimtar pas analizës së mundësive që ofron ndeshja.
"Uzuni është një sulmues i dytë dhe shfrytëzon hapësirat, por gjatë kualifikuesve nuk kemi luajtur kurrë me dy sulmues qendrorë. Mund të shqyrtojmë mundësinë për dy sulmues, por do të vendosim pas analizës", shtoi ai. Silvinjo e bëri të qartë se preferon të luajë me një sulmues qendror dhe një tjetër më tërhequr.
Trajneri gjithashtu vuri në dukje balancën e grupit dhe theksoi se çdo gjë mund të ndodhë në ndeshjen e fundit.
"Të katër ekipet kanë bërë një paraqitje të mirë në Europian. Ne do të tentojmë të fitojmë, sepse luajmë para tifozëve tanë. Kjo është ndeshja e fundit, dhe kemi mundësinë për të mbyllur të parët. Do të japim maksimumin për të arritur këtë objektiv", u shpreh ai.
Silvinjo nënvizoi se, pavarësisht çdo faktori të mundshëm, Shqipëria do të futet në fushë me vetëm një synim: fitoren. "Në futboll gjithçka mund të ndodhë, por objektivi ynë mbetet vendi i parë. Futbolli nuk është një sport për t'u luajtur me frikë, dhe ne do të luftojmë deri në fund për këtë rezultat", përfundoi trajneri.
