Në fund të korrikut, qeveria shqiptare njoftoi me bujë rikthimin në duart e shtetit të shërbimit të dializës, pas përfundimit të koncesionit 10-vjeçar. Por “shtetëzimi” duket se do të ketë një kuptim disi të veçantë, shteti do ta marrë shërbimin, për t’ia besuar sërish një privati.
Me një vendim të posaçëm, Këshilli i Ministrave ngarkoi Operatorin e Shërbimeve të Integruara të Sterilizimit që të marrë në administrim dy shërbime të rëndësishme të shëndetësisë, dializën dhe Programin e Kontrollit Mjekësor Bazë, të njohur si Check-Up.
“Shërbimi i Check-Up-it dhe ai i dializës do të merren në dorëzim dhe do të ofrohen nga shteti”, deklaroi ministrja e Shëndetësisë, Evis Sala, pas mbledhjes së qeverisë më 30 korrik.
Ministrja e prezantoi kalimin e shërbimeve te OSHIS si një hap drejt forcimit të kontrollit publik, standardizimit dhe rritjes së sigurisë për pacientët. Madje, gjatë daljes publike së bashku me administratoren e OSHIS, Arisa Cane, mesazhi ishte i qartë, shteti po ndërton një operator publik të fortë, të aftë për të administruar vetë shërbime të rëndësishme shëndetësore.
Por pa kaluar shumë kohë nga deklarata për rikthimin e dializës në duart e shtetit, në skenë është shfaqur sërish privati.
OSHIS ka parashikuar në regjistrin e Agjencisë së Prokurimit Publik një tender me fond prej 4.6 miliardë lekësh, ose rreth 49 milionë euro, për ofrimin e shërbimit të dializës në pesë spitale publike, Shkodër, Lezhë, Korçë, Vlorë dhe Elbasan.
Kontrata parashikohet të zgjasë katër vjet.
Pra, ndërsa në fund të korrikut qytetarëve iu komunikua se dializa “do të ofrohet nga shteti”, pak më vonë rezulton se shteti po përgatitet të paguajë rreth 49 milionë euro që shërbimi në pesë spitale publike të ofrohet nga një operator privat.
Me pak fjalë, dializa u largua nga privati për t’u kthyer te shteti, ndërsa shteti po hap portofolin për ta çuar përsëri te privati. Një lloj shtetëzimi me vajtje-ardhje.
Në qendër të këtij modeli të ri është OSHIS, shoqëria shtetërore e krijuar pas përfundimit të koncesionit të sterilizimit dhe që tashmë po merr nën administrim një pjesë gjithnjë e më të madhe të shërbimeve dhe fondeve të shëndetësisë.
Operatori drejtohet nga Arisa Cane, e cila më herët ka punuar në struktura private të lidhura me Spitalin Amerikan. Ndërkohë, ministrja Evis Sala ka qenë më parë rektore e Universitetit Western Balkans, pjesë e grupit të biznesmenit Klodian Allajbeu. Këto lidhje profesionale të mëparshme kanë ngritur pikëpyetje publike mbi mënyrën se si po riorganizohet administrimi i shërbimeve dhe fondeve të shëndetësisë.
Historia bëhet edhe më interesante për shkak të precedentit të sterilizimit. Koncesioni 10-vjeçar, me vlerë rreth 100 milionë euro, ka qenë objekt hetimesh nga drejtësia. Pas përfundimit të kontratës, administrimi kaloi te OSHIS, ndërsa tani të njëjtit operator po i shtohen edhe Check-Up-i dhe dializa.
Dhe pikërisht dializa jep provën e parë se “marrja në dorë nga shteti” nuk do të thotë domosdoshmërisht se shërbimi do të kryhet nga vetë shteti.
Ndaj pyetja nuk është më vetëm se kush e administron dializën në letër, por kush do ta fitojë tenderin dhe ku do të përfundojnë 49 milionë eurot e parashikuara për katër vitet e ardhshme.
