Një akt i rëndë kriminal ka tronditur qytetin italian të Fontaniva në orët e para të mëngjesit të djeshëm, ku një shtetas shqiptar është qëlluar me armë zjarri në kokë. Personi shtë identifikuar si Fatos Cenaj, 59 vjeç, i cili ndodhet në gjendje kritike për jetën.
Sipas raportimeve të para, Cenaj u gjet pranë biçikletës së tij nga kalimtarë dhe shoferë që menduan fillimisht se bëhej fjalë për një aksident. Por pas mbërritjes së ndihmës së shpejtë, mjekët konstatuan një plagë të rëndë në kokë, e shkaktuar nga një plumb, duke konfirmuar menjëherë natyrën kriminale të ngjarjes.
Menjëherë pas konstatimit të plagës, 59-vjeçari u transportua me urgjencë në spital, ku mjekët po luftojnë për ta mbajtur në jetë.
Autoritetet italiane kanë nisur hetimet për të zbardhur rrethanat e atentatit dhe për të identifikuar autorin apo autorët e mundshëm. Policia ka sekuestruar pamjet nga kamerat e sigurisë në zonë, të cilat mund të jenë kyçe në identifikimin e përgjegjësve. Deri në këto momente, nuk ka persona të ndaluar apo të dyshuar.
Ngjarja ka tronditur komunitetin lokal dhe atë shqiptar në Itali, ndërsa pritet që orët në vijim të sjellin më shumë detaje mbi motivet dhe autorët e kësaj ngjarjeje të rëndë kriminale.
