Është shpallur vendimi i KAS lidhur me kërkesën e Marash Logut për pavlefshmërinë e zgjedhjeve në qarkun Kukës.
Si prova të vetme për qarkun Kukës, Marash Logu prezantoi:
• raportin e OSBE-ODIHR dhe
• një lajm të portalit Syri.net, ku akuzohej Eduard Shalsi që u kish ushtruar presion policëve.
Nga shqyrtimi i provës rezultoi se fotoja e zbuluar nga portali i pranë PD, në fakt, ishte publikuar nga vetë Eduard Shalsi ditën e dëshmorëve, në nderim të një polici të rënë në krye të detyrës.
Në shpalljen e vendimit të KAS, relatori Ilir Rusmali sqaroi edhe vendimmarrjen e KAS:
“Detyra jonë si trupë nuk ka qenë të përcaktojmë nëse janë të vërteta të gjitha faktet apo jo në seancat e parashtruara. Detyra jonë ka qenë që, midis morisë së fakteve, të identifikonim ato fakte që kanë lidhje me kërkesën për pavlefshmëri zgjedhjesh.
Për këtë të fundit, ne duhej të verifikonim nëse provohej vërtetësia e tyre. Pas kësaj, do të verifikonim se sa kanë ndikuar ato në rezultatin e zgjedhjeve.
Vendimi ynë nuk duhet të bazohet mbi hipoteza, por mbi prova.
Kemi vendosur rrëzimin e kërkesës ankimore numër 37, për subjektin zgjedhor PD-ASHM, për shpalljen e pavlefshme të zgjedhjeve të datës 11.05.2025 në zonën e Kukësit, si të pambështetur në ligj dhe në prova.”
Ilir Rusmali ka qenë për një kohë të gjatë përfaqësues i Partisë Demokratike në Komisionin Qendror të Zgjedhjeve dhe lider i grupit të juristëve të PD që mbronin kauzat zgjedhore dhe juridike të PD.
Ishte koha kur PD fliste me prova dhe fakte të pakundërshtueshme. Koha kur PD fitonte zgjedhjet. Ndërsa së fundmi ai ka qenë në qendër të akuzave të PD për njëanshmëri në vendime duke u bërë pjesë e grupit të “armiqve të brendshme” brenda partisë së drejtuar nga Sali Berisha
