Pas ngjarjes tragjike që tronditi qytetin e Shkodrës më 30 tetor, ku katër persona humbën jetën, Prokuroria e Shkodrës ka shpallur moskompetencën për çështjen, duke ia kaluar hetimet Prokurorisë së Posaçme Kundër Korrupsionit dhe Krimit të Organizuar (SPAK).
SPAK ka nisur hetimet mbi ngjarjen e njohur si “Masakra e Dobraçit”, duke ngritur një grup të posaçëm hetimor për të zbardhur të gjithë rrethanat e krimit. Kjo ngjarje e rëndë është vlerësuar si një nga më të rëndat në Shkodër, jo vetëm për mënyrën brutale me të cilën u krye, por edhe për dyshimet se mund të ishte parandaluar.
Ngjarja ndodhi në Dobraç, ku Hamza Lici dhe Arlind Bushati u vranë në një pritë me armë zjarri. Pas të shtënave, një aksident tragjik ndodhi kur Flutura Basha dhe bashkëshorti i saj Bashkim Basha, të cilët po udhëtonin me motor, humbën kontrollin. Flutura Basha humbi jetën në vend, ndërsa Bashkim Basha ndërroi jetë disa ditë më vonë në spital.
Hetimet pritet të zbulojnë detaje të reja, ndërkohë që prania e dyshimeve për një parandalim të mundshëm e bën këtë çështje edhe më shqetësuese për autoritetet.
